Rithöfundasamband Íslands

The Writers' Union of Iceland


Ísnálin afhent

Hilmar Hilmarsson

Hilmar Hilmarsson hlaut Ísnálina, verðlaun fyrir best þýddu glæpasöguna, fyrir þýðingu sína á bókinni 1793 eftir Niklas Natt och Dag. JPV útgáfa gaf bókina út. 

Verðlaunin voru veitt fimmtudaginn 21. maí 2020 í Dósaverksmiðjunni (The Tin Can Factory) í Borgartúni. Að verðlaununum standa Hið íslenska glæpafélag, Bandalag þýðenda og túlka og Þýðingasetur Háskóla Íslands. Í dómnefnd sátu þau Jóhann R. Kristjánsson, f.h. Bandalags þýðenda og túlka, Katrín María Víðisdóttir, f.h. Hins íslenska glæpafélags og Ingibjörg Þórisdóttir f.h. Þýðingaseturs Háskóla Íslands.

Umsögn dómnefndar

Sagan gerist í Stokkhólmi undir lok 18. aldar. Aflimað lík finnst í forarpolli í Stokkhólmi. Vaktarinn Mickel Cardell og lögfræðingurinn Cecil Winge, rannsaka málið. Þar fléttast saman ólíkar sögur af misgóðu fólki, sögur sem eru hver annarri nöturlegri. Skítur, áfengisböl, svik og undirferli er alls ráðandi. Um er að ræða sögulega glæpasögu sem er ekki fyrir viðkvæma. Höfundi tekst að ná fram þeim ömurleika borgarinnar sem tíðarandi sögunnar kallar á. Reyndar er þessi saga með þeim hryllilegri. 1793 er þó gífurlega spennandi, frásögnin áhrifarík, lipurlega skrifuð og tekst Hilmari prýðilega að koma textanum frá sér á afar sannfærandi og náttúrulegan hátt.

Tilnefningar

Eftirtaldir þýðendur voru tilnefndir til verðlaunanna í ár:

Brynja Cortes Andrésdóttir, fyrir þýðingu sína Annabelle, eftir Lina Bengtsdotter. Bjartur útgáfa gefur út.
Hilmar Hilmarsson, fyrir þýðingu sína 1793, eftir Niklas Natt och Dag. JPV útgáfa gefur út.
Hrafnhildur Guðmundsdóttir, fyrir þýðingu sína Múttan, eftir Hannelore Cayre. Mál og menning gefur út.
Ísak Harðarson, fyrir þýðingu sína Feilspor, eftir Maria Adolfsson. JPV útgáfa gefur út.
Uggi Jónsson, fyrir þýðingu sína Gauksins gal, eftir Robert Galbraith. JPV útgáfa gefur út.


Barnabókaverðlaun Guðrúnar Helgadóttur

Verðlaunahafar ásamt börnum, formanni dómnefndar og borgarstjóra.

Arndís Þórarinsdóttir og Hulda Sigrún Bjarnadóttir hljóta Barnabókaverðlaun Guðrúnar Helgadóttur 2020 fyrir handrit sitt að bókinni Blokkin á heimsenda. Bókin kemur út í dag, þriðjudaginn 19. maí.

Reykjavíkurborg veitir nú Barnabókaverðlaun Guðrúnar Helgadóttur í annað sinn. Þau eru veitt árlega fyrir óprentað handrit að barna- eða ungmennabók og er ætlað að hvetja til metnaðarfullra skrifa fyrir börn og ungmenni og halda á lofti merkjum eins okkar ástsælasta barnabókahöfunda. Verðlaunaféð er ein milljón krónur.

Verðlaunahandrit 2020

Hátt á fimmta tug handrita bárust í samkeppnina í ár og var dómnefndin sammála um að handrit þeirra Arndísar Þórarinsdóttur og Huldu Sigrúnar Bjarndóttur, Blokkin á heimsenda, skyldi hljóta verðlaunin að þessu sinni. Dómnefndina skipuðu þau Geir Finnsson, sem var formaður, Halla Þórlaug Óskarsdóttir og Heiða Rúnarsdóttir. Á lokametrunum fengu þau tvo nemendur úr 6. bekk Háteigsskóla sér til liðsinnis og þakkar Reykjavíkurborg þeim fyrir þeirra mikilvæga framlag.

Ástandið í samfélaginu vegna Covid-19 setti nokkuð strik í reikninginn við verðlaunaafhendinguna sem var seinna í ár en ráð var fyrir gert. Borgarstjóri afhenti verðlaunin í Höfða og var brugðið á það ráð að kvikmynda athöfnina til að sem flestir mættu upplifa og njóta með höfundunum. Stikluna er að finna hér á vef Bókmenntaborgarinnar og einnig  á vef Reykjavíkurborgar.

Blokkin á heimsenda kemur út í dag, þriðjudaginn 19. maí, og er það Mál og menning sem gefur út.

Lesa meira.


Barnabókaverðlaun Reykjavíkurborgar

Rán Flygenring, Dagur B. Eggertsson, Margrét Tryggvadóttir, Þórarinn Eldjárn og Tinna Ásgeirsdóttir.

Margrét Tryggvadóttir, Rán Flygenring og Þórarinn Eldjárn hljóta Barnabókaveðlaun Reykjavíkurborgar 2020 fyrir bækurnar Kjarval: málarinn sem fór sínar eigin leiðir, Vigdís: bókin um fyrsta konuforsetann og Hver vill hugga krílið? eftir Tove Jansson.

Barnabókaverðlaun Reykjavíkurborgar voru veitt við nokkuð óvenjulegar aðstæður í ár vegna Covid-19 og heldur síðar en venjan er. Borgarstjóri, Dagur B. Eggertsson, afhenti höfundunum verðlaunin í Höfða en í stað hefðbundinnar móttöku var brugðið á það ráð að kvikmynda athöfnina til að fleiri mættu njóta og fagna með höfundunum og má sjá stikluna hér á vef Bókmenntaborgarinnar og einnig á vef Reykjavíkurborgar.

Barnabókaverðlaun Reykjavíkurborgar eru veitt í þremur flokkum bóka fyrir börn og ungmenni, flokki frumsaminna bóka, flokki myndlýsinga og flokki þýðinga. Þetta eru elstu barnabókverðlaun á Íslandi en þau voru fyrst veitt sem Barnabókaverðlaun fræðsluráðs Reykjavíkur árið 1973. Árið 2016 voru Dimmalimm verðlaunin og Barnabókaverðlaun Reykjavíkur sameinuð og urðu flokkarnir þá þessir þrír. Verðlaunaféð er 350.000 kr. í hverjum flokki.

Í ár fékk dómnefndin 108 bækur til skoðunar, 32 frumsamdar á íslensku, 54 þýddar og 20 myndríkar. Þetta er um 20% aukning milli ára og var hún mest í flokki þýddra bóka. Fimm bækur voru tilnefndar í hverjum flokki og nú er ljóst hvaða þrjár bækur hljóta verðlaunin í ár. Dómnefnd verðlaunanna skipuðu þau Tinna Ásgeirsdóttir, sem var formaður, Ásmundur Kristberg Örnólfsson, Helga Birgisdóttir, Karl Jóhann Jónsson og Valgerður Sigurðardóttir.

Margrét Tryggvadóttir hlýtur Barnabókaverðlaun Reykjavíkurborgar í flokki frumsaminna bóka fyrir bók sína Kjarval: málarinn sem fór sínar eigin leiðir. Iðunn gaf út.

Rán Flygenring hlýtur Barnabókaverðlaun Reykjavíkurborgar í flokki myndlýsinga í barna- og ungmennabók fyrir bók sína Vigdís: bókin um fyrsta konuforsetann. Angústúra gaf út.

Þórarinn Eldjárn hlýtur Barnabókaverðlaun Reykjavíkurborgar í flokki þýddra bóka fyrir þýðingu sína á Hver vill hugga krílið? eftir Tove Jansson. Mál og menning gaf út.

Lesa meira.


Tilnefningar til Maístjörnunnar

Sigurlín Bjarney Gísladóttir, Þór Stefánsson, Jónas Reynir Gunnarsson, Þórður Sævar Jónsson og Ingibjörg Hilmarsdóttir f.h. Kristínar Eiríksdóttur

 

Maístjarnan, ljóðabókaverðlaun Rithöfundasambands Íslands og Landsbókasafns Íslands – Háskólabókasafns verða veitt í fjórða sinn í maí.

Tilnefningar til Maístjörnunnar vegna ljóðabókar útgefinnar 2019 voru kynntar við athöfn í Gunnarshúsi þann 7. maí.

Tilnefndir eru:
Jónas Reynir Gunnarsson – Þvottadagur (Páskaeyjan)
Kristín Eiríksdóttir – Kærastinn er rjóður (JPV)
Sigurlín Bjarney Gísladóttir – Undrarýmið (Mál og menning)
Þórður Sævar Jónsson – Vellankatla (Partus)
Þór Stefánsson – Uppreisnir (Oddur)

Tilnefndar bækur eru allar til sýnis í anddyri Þjóðarbókhlöðunnar.

Gjaldgengar voru allar útgefnar íslenskar ljóðabækur ársins 2019 sem skilað var til Landsbókasafns Íslands – Háskólabókasafns og fékk dómnefnd þær til umfjöllunar. Dómnefnd skipa Guðrún Steinþórsdóttir fyrir hönd Rithöfundasambandsins og Arnaldur Sigurðsson fyrir hönd Landsbókasafnsins.

Verðlaunin verða veitt við athöfn í Þjóðarbókhlöðunni síðar í maí. Verðlaunafé er 350 þúsund krónur.

Maístjarnan er einu verðlaun á Íslandi sem veitt eru eingöngu fyrir útgefna íslenska ljóðabók. Verðlaununum er ætlað að vekja sérstaka athygli á blómlegri ljóðabókaútgáfu á Íslandi.


Sérstök úthlutun Miðstöðvar íslenskra bókmennta, umsóknarfrestur til 11. maí

Mennta- og menningarmálaráðuneytið hefur veitt Miðstöð íslenskra bókmennta 38 milljóna viðbótarfé, samkvæmt þingsályktun um sérstakt tímabundið fjárfestingarátak stjórnvalda til að vinna gegn samdrætti í hagkerfinu í kjölfar heimsfaraldurs kórónuveiru.

Veittir verða styrkir sem styðja við fjölbreytta starfsemi á sviði lista og menningar með áherslu á sköpun og virka þátttöku listamanna í menningarlífi landsmanna.

Umsóknareyðublöð eru hér.

Umsóknarfrestur er til 11. maí 2020.

Skilyrði fyrir styrkveitingu

• Verkefnið hefjist eigi síðar en 1. september 2020 og verði lokið fyrir 1. apríl 2021.

• Verkefnið uppfylli grunnmarkmið fjárfestingarátaksins um að styðja við eftirspurn og atvinnu til skamms tíma með arðbærum verkefnum.

• Sýnt sé fram á gildi verkefnis og mikilvægi þess fyrir landsmenn.

• Styrkveiting sé til undirbúnings, þróunar og framkvæmdar verkefnis.

• Ítarlegar upplýsingar liggi fyrir um verkefnið, auk kostnaðar- og tímaáætlunar þess.

• Ekki verða veittir styrkir til stofnana sem eru á fjárlögum ríkisins.

Mat á umsóknum og styrkir verða veittir á sama grundvelli og aðrir styrkir Miðstöðvar íslenskra bókmennta.

Úthlutað verður fyrir 1. júní nk.

Upplýsingar á heimasíðu MÍB.


Herferð á Degi bókarinnar 2020

Evrópska rithöfundaráðið (EWC) stendur fyrir herferð á Degi bókarinnar þann 23. apríl 2020 undir myllumerkjunum #behindeverybook og #worldbookday2020 til að vekja athygli á höfundum og þýðendum og framlagi þeirra til menningar og lista.

Leiðbeiningar:

  • Höfundur tekur tvær ljósmyndir af sér með eigin verki, skáldsögu, teiknimyndasögu, þýðingu, leikverki, handriti o.s.frv. Á þeirri fyrri er andlit höfundar falið aftan við verkið og á næstu mynd sést framan í höfund við hlið verksins.
  • Myndirnar eru svo birtar saman á öllum samfélagsmiðlum, facebook, instagram, twitter o.fl. með myllumerkjunum: #behindeverybook og #worldbookday2020
  • og svo má gjarnan merkja Evrópska rithöfundaráðið á twitter: @CouncilWriters, og facebook: facebook.com/europeanwriterscouncil/ og Rithöfundasambandið á facebook: @Rithofundasambandid

Frekari leiðbeiningar má finna á heimasíðu EWC.


Tilnefningar til barna- og unglingabókmenntaverðlauna Norðurlandaráðs

14 verk eru tilnefnd til barna- og unglingabókmenntaverðlauna Norðurlandaráðs 2020 þar á meðal eru íslensku bækurnar Egill spámaður eftir Lani Yamamoto og Villueyjar eftir Ragnhildi Hólmgeirsdóttur.

Lani Yamamoto og Ragnhildur Hólmgeirsdóttir, Ljósmyndir: Lani Yamamoto/Patricia Anna Þormar

Egill spámaður er einstaklega falleg og vel útfærð myndabók. Textinn er knappur og framvinda sögunnar fer að miklu leyti fram í myndunum sem hafa meira vægi í frásögninni án þess þó að segja of mikið. Litir og birta skipta miklu máli í myndunum eins og önnur hrynjandi náttúrunnar. Sagan er fámál, eins og aðalpersónan, en hún býr yfir heimspekilegri íhugun.

Villueyjar er fantasía sem segir frá Arildu, 14 ára stelpu í Norður-evrópska konungsdæminu Eylöndunum, og bróður hennar Maurice. Arilda er feimin en mjög tilfinningarík og greind stúlka. Systkinin eru munaðarlaus og búa hjá afa sínum á herragarði. Þau eru af bláfátækri aðalsætt. Á hverju hausti eru börnin send til eyjar þar sem aðeins eitt hús stendur, heimavistarskólinn þeirra. Af hverju er ekkert annað hús á eyjunni? Af hverju mega börnin ekki fara upp á heiðarnar og af hverju þagna allir þegar talað er um hina horfnu Koparborg?

Allar tilnefningar til barna- og unglingabókmenntaverðlauna Norðurlandaráðs 2020.


Tími til að lesa

Ræktum lesandann og setjum fyrsta heimsmetið í lestri

Mennta- og menningarmálaráðuneytið hleypir í dag af stokkunum lestrarverkefni fyrir þjóðina, þar sem börn og fullorðnir eru hvött til að nýta til lesturs þann tíma sem gefst við núverandi aðstæður.

Lestur er sérstaklega mikilvægur fyrir börn, enda ræðst námsárangur barna að stórum hluta af lesskilningi sem eykst með auknum lestri. Lestur veitir fullorðnum örvandi hvíld frá amstri og áhyggjum dagsins og með lestri aukum við saman veg íslenskrar tungu. Orðaforði eykst, nýjar hugmyndir kvikna, skilningur á lesmáli eykst og þannig skilningur á heiminum öllum. Þá styður aukinn lestur við skapandi stétt rithöfunda, skálda og þýðenda. Því meira sem við lesum því betra!

Lestrarverkefnið kallast Tími til að lesa.  Heitið er dregið af aðstæðunum sem nú eru uppi, þar sem margir hafa meiri tíma en áður til að lesa og þörfin á hugarleikfimi hefur sjaldan verið meiri. Þá er afraksturinn mældur í tíma, þar sem Íslendingar eru hvattir til að skrá sinn lestur í mínútum á vefsíðunni timitiladlesa.is. Þar geta þátttakendur skráð sinn lestur reglulega og fylgst með sameiginlegum árangri þjóðarinnar frá degi til dags. Á næstu fjórum vikum munu þar safnast upp ýmsar upplýsingar um lestur, hugmyndir að lesefni fyrir ólíka aldurshópa, hvatningarmyndbönd frá rithöfundum og öðrum sem segja okkur hvað og hvar þeim finnst gaman að lesa.

Verkefnið mun standa til 30. apríl og að því loknu munum við freista þess að fá afraksturinn skráðan í Heimsmetabók Guinnes. Slíkt hefur ekki verið gert áður og því yrði hér um að ræða fyrsta heimsmet sinnar tegundar. Metið gæti orðið viðmið annarra þjóða, eða okkar sjálfra til að bæta með tíð og tíma.

Umgjörð og útlit verkefnisins tekur mið af markmiðinu, þar sem ætlunin er að virkja keppnisskap þjóðarinnar. Merki verkefnisins svipar til merkja íþróttafélaga, keppnistreyjur verða veittar heppnum þátttakendum í lok verkefnisins og leitað verður samstarfs víða til að virkja sem flesta. Ef vel tekst til, gæti verkefnið orðið góður vitnisburður bókaþjóðarinnar Íslendinga um allan heim.

Heimasíða og skráning!


Tilnefningar til íslensku hljóðbókaverðlaunanna 2020

Tutt­ugu bæk­ur í fjór­um flokk­um voru til­nefnd­ar til Íslensku hljóðbóka­verðlaun­anna, Stor­ytel Aw­ards 2020. Verðlaun­in verða af­hent í fyrsta sinn 22. apríl í Hörpu. Greint var frá til­nefn­ing­unni í dag í bóka­stofu Hót­el Holts. Rit­höf­und­ar, leik­ar­ar og þýðend­ur hljóta verðlaun fyr­ir verk sín. El­iza Reid for­setafrú af­hend­ir sér­stök heiður­sverðlaun. Verðlauna­grip­ur­inn er glerl­ista­verk eft­ir sænska lista­mann­inn Ludvig Lofgren.

Eft­ir­far­andi rit­höf­und­ar, þýðend­ur og les­ar­ar hljóta til­nefn­ingu fyr­ir verk sín til Íslensku hljóðbóka­verðlaun­anna, Stor­ytel Aw­ards: 

Barna- og ung­menna­bæk­ur

Nýr heim­ur – æv­in­týri Esju í borg­inni, Höf­und­ur: Sverr­ir Björns­son, Les­ari: Álfrún Helga Ornolfsdottir

Vetr­ar­gest­ir, Höf­und­ur: Tóm­as Zoëga, Les­ari: Salka Sól Ey­feld

(lang)Elst­ur í leyni­fé­lag­inu, Höf­und­ur: Bergrún Íris Sæv­ars­dótt­ir, Les­ari: Sig­ríður Láretta Jóns­dótt­ir

Litlu álfarn­ir og flóðið mikla, Höf­und­ur: Tove Jans­son, Þýðandi: Þór­dís Gísla­dótt­ir, Les­ari: Friðrik Erl­ings­son

Harry Potter og blend­ingsprins­inn, Höf­und­ur: J.K. Rowl­ing, Þýðandi: Helga Auðardóttir, Les­ari: Jó­hann Sig­urðar­son

Glæpa­sög­ur

Brúðan, Höf­und­ur: Yrsa Sig­urðardótt­ir, Les­ari: Þor­vald­ur Davíð Kristjáns­son

Marrið í stig­an­um, Höf­und­ur: Eva Björg Ægis­dótt­ir, Les­ari: Íris Tanja Flygenring

Gull­búrið, Höf­und­ur: Camilla Läckberg, Þýðandi: Sig­urður Þór Sal­vars­son, Les­ari: Þór­unn Erna Clausen

Búrið, Höf­und­ur: Lilja Sig­urðardótt­ir, Les­ari: Elín Gunn­ars­dótt­ir

Þorpið, Höf­und­ur: Ragn­ar Jónas­son, Les­ari: Íris Tanja Flygenring

Skáld­sög­ur

Kópa­vogskrónika, Höf­und­ur: Kamilla Ein­ars­dótt­ir, Les­ari: Þór­dís Björk Þorfinns­dótt­ir

Svik­ar­inn, Höf­und­ur: Lilja Magnús­dótt­ir, Les­ari: Þór­unn Erna Clausen

Gríma, Höf­und­ur: Benný Sif Ísleifs­dótt­ir, Les­ari: Þór­dís Björk Þorfinnsdóttir

Florida, Höf­und­ur: Bergþóra Snæ­björns­dótt­ir, Les­ari: Bergþóra Snæ­björnsdótt­ir

Fjöll­in, Höf­und­ur: Sandra B. Clausen, Les­ari: Álfrún Helga Örn­ólfs­dótt­ir

Al­menn­ar bæk­ur

Vertu úlf­ur: warg­us esto, Höf­und­ur: Héðinn Unn­steins­son, Les­ari: Hjálm­ar Hjálm­ars­son

Á eig­in skinni, Höf­und­ur: Sölvi Tryggva­son, Les­ari: Sölvi Tryggva­son

Ég gefst aldrei upp, Höf­und­ur: Borg­hild­ur Guðmunds­dótt­ir, Les­ari: Lilja Katrín Gunn­ars­dótt­ir

Geðveikt með köfl­um, Höf­und­ur: Sig­ur­steinn Más­son, Les­ari: Sig­ur­steinn Más­son

Horn­auga, Höf­und­ur: Ásdís Halla Braga­dótt­ir, Les­ari: Ásdís Halla Braga­dótt­ir, Þór­unn Hjartardóttir

Rithöfundasamband Íslands óskar höfundum og þýðendum til hamingju með tilnefningarnar!