Rithöfundasamband Íslands

The Writers' Union of Iceland


Vorvindar IBBY

img_3473

Sunnudaginn 13. maí veitti Íslandsdeild IBBY sínar árlegu viðurkenningar fyrir framlög til barnamenningar, Vorvinda, við athöfn í Gunnarshúsi, húsi Rithöfundasambands Íslands.

Vorvindum er ætlað að vekja athygli á verkum og starfsemi sem hleypir ferskum og endurnærandi vindum inn í íslenska barnamenningu. Að þessu sinni voru Vorvindahafarnir fjórir.

Bókaráð Hagaskóla hlaut Vorvinda fyrir framlag sitt til barnamenningar. Bókaráð Hagaskóla samanstendur af 15 nemendum úr unglingadeild Hagaskóla. Ráðið stóð fyrir málþingi fyrr í vetur, Barnið vex en bókin ekki, sem sýndi fram á tilfinnanlegan skort á barna- og unglingabókum á íslensku. Fjölmargir sóttu þingið, meðal annars menntamálaráðherra Íslands sem í kjölfar málþingsins boðaði til aðgerða og setti á fót sérstakan styrktarsjóð til handa barnabókaútgáfu.

Lestrarvinir hlutu Vorvinda fyrir starf sitt. Lestrarvinir leiða saman sjálfboðaliða annars vegar og börn sem þurfa á aðstoð að halda við lestur og fjölskyldur þeirra hins vegar. Sjálfboðaliðarnir lesa fyrir börnin á heimilum þeirra og fara með þeim á bókasöfn.

Sævar Helgi Bragason hlaut Vorvinda fyrir að miðla fróðleik til barna- og unglinga af mikilli eljusemi, ástríðu og fórnfýsi. Þetta gerir hann á hinum ýmsu miðlum en er jafnframt alltaf boðinn og búinn að svara öllum spurningum barna og unglinga, halda fyrirlestra í skólum og hvar þar sem fróðleiksþyrst börn koma saman.

Ævar Þór Benediktsson hlaut Vorvinda fyrir lestrarátak Ævars vísindamanns. Hann hefur staðið fyrir einstökum og metnaðarfullum lestrarátökum árlega síðan árið 2014. Þetta eljusama og fágæta framtak Ævars hefur skilað sér í því að börn á Íslandi hafa lesið 230 þúsund bækur í fjórum lestrarátökum.

Íslandsdeild IBBY óskar verðlaunahöfum til hamingju og hvetur þá alla til frekari dáða.


Starfsstyrkir – minnt á umsóknarfrest 7. maí

Opið er fyrir umsóknir um starfsstyrki úr Höfundasjóði RSÍ. Styrkirnir eru veittir til ritstarfa og áhersla er lögð á að styrkja höfunda til að ljúka verkum sem eru langt komin. Sótt er um á rafrænu eyðublaði á heimasíðu RSÍ. Til úthlutunar eru 3.500.000 kr. Veittir verða allt að tíu styrkir. Umsóknarfrestur t.o.m. 7. maí 2018.


Höfundamiðstöð RSÍ auglýsir eftir bókmenntadagskrám til þátttöku í Skáld í skólum 2018 – umsóknarfrestur til 4. maí

Árlega býður Höfundamiðstöð RSÍ grunnskólum um land allt upp á bókmenntadagskrár undir heitinu Skáld í skólum þar sem rithöfundar hitta nemendur á aldrinum 6-16 ára til að fjalla um bókmenntir. Skáld í skólum er ómissandi þáttur í kynningu nútímabókmennta í grunnskólum landsins en yfir 60 mismunandi dagskrár hafa orðið til innan vébanda verkefnisins frá því það hóf göngu sína 2006. Dagskrárnar sem boðið er upp á í Skáld í skólum eru metnaðarfullar og spennandi; rithöfundar koma í heimsókn til að fjalla um bækur og lestur, sköpun og skrif, ævintýri sögupersóna jafnt sem skapara þeirra og síðast en ekki síst til að smita nemendur og kennara af ólæknandi lestrargleði!

Höfundamiðstöð RSÍ auglýsir nú eftir bókmenntadagskrám til þátttöku í Skáld í skólum 2018 en sótt er um á heimasíðu RSÍ og er umsóknarfrestur framlengdur t.o.m. 4.  maí.


Af aðalfundi

Karl Agust

Karl Ágúst Úlfsson var kjörinn nýr formaður Rithöfundasambands Íslands á aðalfundi sambandsins í gær þann 26. apríl. Hann tekur við sem formaður af Kristínu Helgu Gunnarsdóttur sem gegnt hefur embættinu undanfarin fjögur ár.

Vilborg Davíðsdóttir var endurkjörin varaformaður og Bjarni Bjarnason endurkjörinn varamaður. Jón Gnarr var kjörinn meðstjórnandi í stað Hallgríms Helgasonar sem ekki gaf kost á sér til endurkjörs.

Auk ofantalinna sitja í stjórninni meðstjórnendurnir Margrét Tryggvadóttir og Vilhelm Anton Jónsson og varamaðurinn Sigurlín Bjarney Gísladóttir.

formenn 001

Á fundinum var Pétur Gunnarsson kjörinn heiðursfélagi Rithöfundasambands Íslands.


Aðalfundur Rithöfundasambands Íslands 2018 26. apríl kl. 19.30 í Gunnarshúsi

Dagskrá:

  1. Skýrsla formanns
  2. Skýrsla gjaldkera
  3. Lýsing stjórnarkjörs
  4. Kosning í inntökunefnd
  5. Kosning félagslegra skoðunarmanna
  6. Kosning í úthlutunarnefnd Höfundasjóðs
  7. Tillaga stjórnar um árgjald 2019
  8. Tillaga stjórnar að heiðursfélaga RSÍ
  9. Lagabreytingar
  10. Ljósvakasjóður, nýjar reglur fyrir IHM-greiðslur RSÍ
  11. Samningar við leikhúsin
  12. Önnur mál


Skýrsla starfshóps um bókmenningarstefnu

downloadKristján Þór Júlíusson þáverandi mennta- og menningarmálaráðherra skipaði sl. haust starfshóp um gerð bókmenningarstefnu þar sem íslensk bókaútgáfa og aðstæður hennar yrðu skoðaðar.

Í skýrslunni eru settar fram tillögur að aðgerðum sem ætlað er að styrkja íslenska bókaútgáfu, efla höfunda og tryggja börnum aðgang að góðum bókum og námsefni.

Skýrslan er aðgengileg hér á vef stjórnarráðsins.


Eva Björg Ægisdóttir hlaut Svartfuglinn

 

höf

Eva Björg Ægisdóttir

Eva Björg Ægisdóttir hlaut spennusagnaverðlaunin Svartfuglinn fyrir sögu sína Marrið í stiganum sem komin er út hjá Veröld. 

Marrið í stiganum er fyrsta bók Evu Bjargar Ægisdóttur og bar handrit hennar sigur úr býtum í samkeppninni um Svartfuglinn, glæpasagnaverðlaun sem Yrsa Sigurðardóttir og Ragnar Jónasson stofnuðu til í samvinnu við Veröld.

Í umsögn dómnefndar segir: „Sagan er grípandi og spennandi samhliða því að veita innsýn í myrkan og sáran veruleika. Fléttan er fagmannlega unnin, söguþráðurinn sterkur og sögulokin koma lesandanum á óvart. Spennandi og átakanleg glæpasaga eftir höfund sem án nokkurs vafa mun kveða mikið að í framtíðinni.“

Rithöfundasamband Íslands óskar Evu Björg innilega til hamingju með verðlaunin.