Bætur vegna eintakagerðar til einkanota skv. 11. gr. höfundalaga
Rithöfundasamband Íslands (RSÍ) og Félag leikskálda og handritshöfunda (FLH) taka við greiðslum frá Innheimtumiðstöð rétthafa (IHM).
Greiðslurnar renna í Ljósvakasjóð sem úthlutar til höfunda og þýðenda leiktexta og annarra skáldverka í samræmi við reglur sjóðsins.
Greiðsla til handritshöfunda/leikskálda er í formi eingreiðslu og er ekki greitt fyrir endurteknar sýningar á almanaksári. Athugið að ekki er greitt fyrir sýningar á áskriftastreymisveitum, leigum eða Sarpi.
Hagþenkir annast úthlutanir til rétthafa fræðslu- og heimildaefnis eftir eigin reglum.
Skráning í Ljósvakasjóð
Leitað er eftir skráningarupplýsingum rétthafa, sem telja sig eiga rétt til úthlutunar skv. 2. gr. Skráningarupplýsingum skal skilað á þar til gerðu skráningareyðublaði. Athugið að greitt er út skv. 2. gr. eftir skýrslum frá sjónvarps- og útvarpsstöðvum.
Þeir sem þegar hafa skilað skráningu og/eða fengið greitt úr sjóðnum þurfa EKKI að skrá sig aftur.
Úthlutun skv. 5. gr. B: Rétthafagreiðslur skv. sérstökum umsóknum
Um slíka úthlutun geta sótt;
- þýðendur skjátexta
- rétthafar að styttri verkum, brotum úr verkum og stökum ljóðum
- frumhöfundar skáldverka sem leikgerðir, þættir eða kvikmyndir hafa verið gerðar eftir.
Í umsóknum um greiðslur skv. þessum lið skal rökstyðja og gera grein fyrir notkun á einstökum verkum á umsóknartímabili.
Úthlutað er á grundvelli mats úthlutunarnefndar. Hér má finna umsóknareyðublað.
Umsóknarfrestur vegna úthlutunar fyrir birt efni 2023 er til 10. september 2024. Ekki er tekið við umsóknum eftir þann tíma.
