Smásagan Héðan í frá, sem dómnefnd valdi sem bestu söguna í samkeppni sendinefndar Evrópusambandsins, upplýsingaskrifstofu Sameinuðu þjóðanna, Rithöfundasambands Íslands, Hugvísindastofnun HÍ og Hafnar – HÔTEL DU NORD hefur nú verið birt á vef Sendinefndar ESB á Íslandi. Samkeppnin var haldin í tilefni 70 ára afmælis Mannréttindayfirlýsingar Sameinuðu þjóðanna. Sögurnar áttu að fjalla um mannréttindi á einhvern hátt og var þátttaka mjög góð (á áttunda tug sagna). Höfundur Héðan í frá er Rúnar Snær Reynisson og hlýtur hann að launum dvöl í gestaíbúð fyrir listamenn í Marseille, Frakklandi. Við þökkum öllum þeim sem tóku þátt, samstarfsaðilum okkar en einkum dómnefndinni, sem samanstóð af þeim Ástráði Eysteinssyni, Gauta Kristmannssyni og Halldóru K. Thoroddsen.
