Verið velkomin á höfundakvöld í Gunnarshúsi föstudaginn 13. desember kl. 18:00.
Þar munu sex höfundar lesa upp úr nýútkomnum bókum sínum – Bergþóra Snæbjörnsdóttir les úr skáldsögunni Svínshöfuð, Brynja Hjálmsdóttir les úr ljóðabókinni Okfruman, Gerður Kristný les upp úr ljóðabókinni Heimskaut, Hanna Óladóttir les úr ljóðabókinni Stökkbrigði, Kristín Ómarsdóttir les úr skáldsögunni Svanafólkið og Vigdís Grímsdóttir les úr bókinni Systa: bernskunnar vegna.
Við bjóðum þér til stofu til þess að tala um barna- og ungmennabækur!
Rithöfundarnir Arndís Þórarinsdóttir, Brynhildur Þórarinsdóttir, Sigrún Elíasdóttir og Ævar Þór Benediktsson blása til notalegs upplestrarkvölds í Gunnarshúsi, Dyngjuvegi 8, kl. 20:00 þann 12. desember.
Þau segja frá nýjustu bókunum sínum og lesa brot úr sögunum fyrir gesti. Dagskráin er ætluð öllum þeim sem hafa unun af því að lesa bækur um ungar söguhetjur, öllum sem þekkja unga lesendur og öllum sem finnst að barna- og ungmennabækur skipti höfuðmáli í hverju samfélagi.
Bækurnar sem lesið verður úr eru:
Þinn eigin tölvuleikur eftir Ævar Þór Benediktsson
Leitin að vorinu eftir Sigrúnu Elíasdóttur
Ungfrú fótbolti eftir Brynhildi Þórarinsdóttur
Nærbuxnanjósnararnir eftir Arndísi Þórarinsdóttur
Kaffi, piparkökur og kertaljós – og bækurnar verða til sölu og áritanir í boði.
Tilnefningar til Íslensku þýðingaverðlaunanna voru kynntar þann 7. desember sl. Þann 11. og 17. desember verða haldin þýðendakvöld í Gunnarshúsi, Dyngjuvegi 8, þar sem tilnefndir þýðendur lesa upp úr verkum sínum. Upplestrarnir hefjast kl. 20:00 báða dagana.
11. desember verður lesið úr eftirfarandi bókum:
Skáldið er eitt skrípatól. Um ævi og skáldskap Fernando Pessoa. Höfundur Guðbergur Bergsson. Þýðandi: Guðbergur Bergsson (þýðandi les). JPV gefur út.
Jónsmessunæturdraumur. Höfundur William Shakespeare. Þýðandi: Þórarinn Eldjárn (þýðandi les).Vaka-Helgafell gefur út.
Kona í hvarfpunkti. Höfundur Nawal el Saadawi. Þýðandi: Elísa Björg Þorsteinsdóttir (þýðandi les). Angústúra gefur út.
Hin ósýnilegu. Höfundur Roy Jacobsen. Þýðandi: Jón St. Kristjánsson (þýðandi les). Mál og menning gefur út.
17. desember verður lesið úr eftirfarandi bókum:
Kalli breytist í kjúkling. Höfundur Sam Copeland. Þýðandi: Guðni Kolbeinsson (þýðandi les). JPV gefur út.
Blá. Höfundur Maja Lunde. Þýðandi: Ingunn Ásdísardóttir (þýðandi les). Mál og menning gefur út.
Hvað er betra á aðventunni en að koma og hlusta á rithöfunda lesa úr verkum sínum og gæða sér á léttum veitingum í einu fallegasta húsi landsins? Fimmtudagskvöldið 5. desember kl. 20.00 verður einmitt höfundakvöld í Gunnarshúsi, allir velkomnir, léttar veitingar í boði. Höfundarnir sem munu lesa úr verkum sínum eru Sigurlín Bjarney Gísladóttir, Ragnheiður Harpa Leifsdóttir, Eyrún Ósk Jónsdóttir, Hildur Kristín Thorstensen og Eygló Jónsdóttir.
Sigurlín Bjarney Gísladóttir hefur gefið út ljóðabækur, smásagnasafn og nóvellu og nýjasta ljóðabókin, Undrarýmið, kom út fyrr á þessu ári. Undrunin og óravíddir tilverunnar eru meginstefin í ljóðunum sem spretta hér fram og tengjast á óvæntan hátt myndum úr aldagömlum ritum um náttúrufræði og læknisfræði.
Ragnheiður Harpa Leifsdóttir er rithöfundur og sviðslistakona. Hún hefur samið og unnið að leiksýningum, gjörningum og innsetningum hérlendis og erlendis. Ritverk hennar og ljóð hennar hafa birst í ýmsum útgáfum og heyrst í útvarpi. Hún er hluti af ljóðakollektívinu Svikaskáld, en saman hafa þær gefið út þrjár ljóðabækur. Ljóðabók hennar Sítrónur og náttmyrkur er hennar fyrsta í fullri lengd og kom út 21. nóvember.
Eyrún Ósk Jónsdóttir vann bókmenntaverðlaun Tómasar Guðmundssonar 2016. Auk þess að senda frá sér fjórar skáldsögur, fimm ljóðabækur og eina myndskreytta barnabók hefur Eyrún skrifað leikrit, kvikmyndahandrit, greinar og fyrirlestra, m.a um friðarmál og mannúðarheimspeki búddisma. Nýverið sendi hún frá sér ljóðabókina ,,Mamma má ég segja þér?“
Hildur Kristín er 27 ára gömul listakona. Hún kláraði leiklistabrautina við Fjölbrautarskólann í Garðabæ 2014 og fór því næst í sviðslistarnám við Länsi-Suomen opisto í Finnlandi. Hún kláraði framhaldsprófið í klassískum söng og tónlist við Söngskólann í Reykjavík árið 2017. Hún lærði leiklist við Cours florent í París og síðar í Rose Bruford í London. Hún hefur gefið út ljóðabók og barnabók. Auk þess hefur hún skrifað leikrit og starfað við þýðingar. Hún hefur einnig leikstýrt verkum fyrir listahópinn Kvist. Hildur gaf út barnabókina Töfraloftbelgurinn nú á dögunum.
Eygló Jónsdóttir er með meistaragráðu í ritlist. Hún situr í ritnefnd fyrir tímaritið Mannúð, sem fjallar um frið og mannréttindi. Hún hefur gefið út barnabókina Ljóti jólasveinninn og ljóðabókina Áttun. Hún hefur skrifað fjölda greina í blöð/tímarit og ljóð eftir hana og sögur hafa birst í safnritum. Í ár var hún fengin til þess að semja 17. júní-ljóð fjallkonunar fyrir Hafnarfjarðarbæ og þessa dagana er hún að undirbúa útgáfu á smásagnasafni sínu sem Bókabeitan mun gefa út.
Andri Snær Magnason, Ásta Fanney Sigurðardóttir og Kristín Eiríksdóttir
Verið velkomin á höfundakvöld í Gunnarshúsi miðvikudaginn 4. desember kl. 20:00.
Þar munu þrír höfundar lesa upp úr nýútkomnum bókum sínum – Ásta Fanney Sigurðardóttir les úr ljóðabókinni Eilífðarnón, Kristín Eiríksdóttir úr ljóðabókinni Kærastinn er rjóður, og Andri Snær Magnason úr fræðibókinni Um tímann og vatnið.
Anna Dóra Antonsdóttir og Kristrún Guðmundsdóttir, kynna nýútkomna matreiðslubók sína Uppskriftir stríðsáranna – matur úr íslenskum eldhúsum eftir stríð á höfundakvöldi í Gunnarshúsi þann 3. desember kl. 20.00.
Hér er á ferðinni öðruvísi matreiðslubók með aðkomu fjögurra kvenna. Uppskriftirnar urðu kveikjan að samtali milli höfunda við leit að formi nýrrar matreiðslubókar.
Hvað eiga
fornaldargarðar, kafbátar og revíur sameiginlegt? Því er hægt að komast að á
höfundakvöldi í Gunnarshúsi, fimmtudaginn 28. nóvember kl. 20:00, en þá munu
þrír höfundar, þau Una Margrét Jónsdóttir, Illugi Jökulsson og Árni Einarsson kynna
nýútkomnar bækur sínar í Gunnarshúsi, Dyngjuvegi 8.
Þórarinn Eldjárn stýrir
umræðum.
Höfundar árita bækur.
Kaffi og léttar
veitingar.
Allir eru velkomnir.
Verkin sem kynnt verða:
Árni Einarsson
Tíminn sefur. Fornaldargarðarnir miklu á Íslandi.
Bókin fjallar um
umfangsmikið kerfi torfveggja sem nú hefur verið rannsakað í nærfellt tvo
áratugi og eru að miklu leyti frá þjóðveldisöld. Torfveggir þessir hafa legið
svo þúsundum kílómetra skiptir um flestar byggðir landsins. Samanlögð lengd
þeirra jafngildir fjarlægðinni milli Hornafjarðar og Hong Kong.
Illugi Jökulsson
Úr undirdjúpunum til Íslands. Julius Schopka, U-52
og heimsstyrjöldin fyrri.
Árið 1920 kom ungur Þjóðverji
til Íslands, háseti á skonnortu. Hann veiktist og varð eftir þegar skipið hans
sigldi og bjó hér síðan. Hann átti viðburðaríka ævi að baki, hafði verið háseti
á kafbátnum U-52 og átti þátt í að sökkva mörgum skipum og upplifði hræðilega
atburði. Bókin er byggð á minningum Schopka sjálfs en einnig fjölda annarra
heimilda og þar segir ekki aðeins frá Schopka og U-52 heldur einnig frá gangi
stríðsins og heimsmálanna.
Una Margrét Jónsdóttir
Gullöld revíunnar.
Bókin er saga revíunnar á
Íslandi, fyrri hluti sem nær frá 1880 til 1957. Rakinn er söguþráður í öllum
revíum sem Una Margrét hefur fundið frá þessu tímabili, sagt frá revíunum og
viðtökum við þeim, og frá höfundum og helstu leikurum. Einnig er sérstaklega
fjallað um revíusöngvana.
Næstkomandi þriðjudagskvöld 12. nóvember kl. 20:00 verður kynning í Gunnarshúsi, Dyngjuvegi 8, á nýrri bók um leikskáldið og ljóðskáldið Jóhann Sigurjónsson, en í haust eru liðin hundrað ár frá dauða skáldsins, sem þá var aðeins 39 ára.
Bókin nefnist Úti regnið grætur og er höfundur Sveinn Einarsson, en Hið íslenska bókmenntafélag gefur bókina út.
Í bókinni kemur höfundur fram með nýjar kenningar um áhrif að utan á ljóðskáldskap Jóhanns, einkum frá symbólistum og öðrum módernistum aldamótaáranna um 1900, spyr í hvaða mæli þetta sama andóf frá raunsæisstefnunni setti mót sitt á leikritun Jóhanns og með hvaða hætti.
Höfundur heldur því fram með samanburði, að Jóhann hafi verið fremsta leikskáld Norðurlanda um sína daga og spyr, hvernig honum hafi vegnað bæði í Danmörku og annars staðar í heiminum meðan hann lifði og hvert sé orðspor hans í dag, til dæmis hvernig við Íslendingar höfum ræktað minningu hans.
Sveinn Einarsson er löngu þjóðþekktur fyrir afskipti sín af menningarmálum, meðal annars sem leikstjóri um hálfrar aldar skeið og sem höfundur hátt á annan tug bóka. Meðal rita hans eru Íslensk leiklist í þremur bindum, bók um leikskáldið Kamban og bókin Leiklistin í veröldinni.
Samkoman í Gunnarshúsi hefst kl. 20.00. Þar segir Sveinn frá hvata og tilurð bókarinnar, og situr síðan fyrir svörum, en leikskáldið Hrafnhildur Hagalín stýrir samkomunni og meðal frummælenda í almennu umræðunum verða bókmenntafræðingarnir Dagný Kristjánsdóttir og Eiríkur Guðmundsson.
