Rithöfundasamband Íslands

The Writers' Union of Iceland


Laun í sóttkví og vegna tekjuskerðingar, tilkynning frá Skattinum

Vinsamlegast athugið að þeir höfundar sem hafa orðið að sæta sóttkví geta sótt um laun í sóttkví hjá Vinnumálastofnun og eins geta þeir höfundar sem hafa orðið fyrir tekjuskerðingu frá 15. mars sótt um atvinnuleysisbætur vegna minnkaðs starfshlutfalls.

Tilkynning frá skattinum:

Samþykkt hefur verið á Alþingi að greiða sjálfstætt starfandi einstaklingum launatap vegna þess að viðkomandi hafi orðið að sæta sóttkví. Umsóknum um laun í sóttkví skal beint til Vinnumálastofnunar.

Einnig er hægt að sækja um til Vinnumálastofnunar atvinnuleysisbætur vegna minnkaðs starfshlutfalls sjálfstætt starfandi manna. Heimildin er til staðar frá 15. mars til 1. júní 2020. Ekki þarf að stöðva reksturinn til þess að eiga rétt á umræddum bótum heldur þarf að tilkynna Skattinum um skerta starfsemi. Rekstraraðilar eru því enn skráðir bæði á launagreiðendaskrá og virðisaukaskattsskrá ef eingöngu er um að ræða tímabundnar breytingar.

Notast er við eyðublað RSK 5.02 til að tilkynna um slíkar breytingar. Eyðublaðið má senda, undirritað, í tölvupósti á rsk@rsk.is.

Nánar má lesa um þetta á upplýsingavef Skattsins.

Vefur Vinnumálastofnunar.


Tilnefningar til Barnabókaverðlauna Reykjavíkurborgar

Höfundar fimmtán barna- og unglingabóka voru tilnefndir til Barnabókaverðlauna Reykjavíkurborgar þann 9. mars, en verðlaunin eru veitt í þremur flokkum: flokki barna- og ungmennabóka frumsaminna á íslensku, flokki þýddra barna- og ungmennabóka og flokki myndlýstra bóka. Athöfnin fór fram í Okinu, nýju rými fyrir ungmenni í Borgarbókasafninu í Gerðubergi.

Bækurnar fimmtán sem tilnefndar voru komu allar út á liðnu ár og þykja bera af í barnabókaútgáfu. Við athöfnina í Gerðubergi flutti Skúli Helgason, formaður skóla og frístundaráðs, ávarp og dómnefnd kynnti tilnefndar bækur og rökstuðning fyrir valinu. Verðlaunin verða svo afhent hefðinni samkvæmt síðasta vetrardag í Höfða.

Eftirtaldir rithöfundar, myndhöfundar og þýðendur eru tilnefndir til Barnabókaverðlauna Reykjavíkurborgar 2020 fyrir eftirtaldar bækur.

Barnabækur frumsamdar á íslensku

  • Gunnar Helgason: Draumaþjófurinn. Mál og menning gaf út.
  • Margrét Tryggvadóttir: Kjarval: málarinn sem fór sínar eigin leiðir. Iðunn gaf út.
  • Hildur Knútsdóttir Nornin. JPV gaf út.
  • Ragnhildur Hólmgeirsdóttir: Villueyjar. Björt gaf út.
  • Snæbjörn Arngrímsson: Rannsóknin á leyndardómum eyðihússins. Vaka-Helgafell gaf út.

Myndlýsingar í barnabókum

  • Bergrún Íris Sævarsdóttir: Ró – fjölskyldubók um frið og ró. Töfraland gaf út.
  • Blær Guðmundsdóttir: Sipp, Sippsippanipp og Sippsippanippsúrumsipp: systurnar sem ætluðu sko ekki að giftast prinsum! Bókabeitan gaf út.
  • Jón Páll Halldórsson: Vargöld, 2. bók. Iðunn gaf út.
  • Lani Yamamoto: Egill spámaður. Angústúra gaf út.
  • Rán Flygenring: Vigdís: bókin um fyrsta konuforsetann. Angústúra gaf út.

Þýddar barnabækur

  • Illugi Jökulsson: Bók um tré eftir Piotr Socha og Wojciech Grajkowski. Sögur útgáfa gaf út.
  • Jón St. Kristánsson: Villinorn: Bækurnar Blóð Viridíönu og Hefnd Kímeru eftir Lene Kaaberbøl. Angústúra gaf út.
  • Silja Aðalsteinsdóttir: Snjósystirin eftir Maju Lunde. Mál og menning gaf út.
  • Þórarinn Eldjárn: Hver vill hugga krílið? eftir Tove Jansson. Mál og menning gaf út.
  • Þórdís Gísladóttir: Múmínálfarnir: Minningar múmínpabba eftir Tove Jansson. Mál og menning gaf út.

Barnabókaverðlaun Reykjavíkurborgar eiga sér lengsta sögu barnabókaverðlauna á landinu og er helsta markmið þeirra að vekja athygli á því sem vel er gert í bókaútgáfu fyrir unga lesendur svo og að hvetja þá til bóklesturs. Dómnefnd er skipuð Tinnu Ásgeirsdóttur formanni, Ásmundi Kristberg Örnólfssyni, Helgu Birgisdóttur, Karli Jóhanni Jónssyni og Valgerði Sigurðardóttur.

Rithöfundasamband Íslands óskar höfundum, myndhöfundum og þýðendum til hamingju með tilnefningarnar.

Nánari upplýsingar og rökstuðning dómnefndar má finna á vef Reykjavíkurborgar.


Ferðastyrkir – opið fyrir umsóknir

Rithöfundasamband Íslands veitir félagsmönnum ferðastyrki til utanlandsferða úr Höfundasjóði RSÍ. Rétt til að sækja um ferðastyrk hafa þeir sem hafa verið félagsmenn í RSÍ í a.m.k. eitt ár og eru skuldlausir við sambandið.  Úthlutað er eftir úthlutunarreglum og sótt er um á rafrænu eyðublaði á heimasíðu RSÍ.

Opið er fyrir umsóknir og umsóknarfrestur er t.o.m. 1. apríl 2020.


Aðalfundur RSÍ 2020 – Framboðsfrestur

Aðalfundur RSÍ verður haldinn fimmtudaginn 30. apríl 2020. Framboðsfrestur vegna stjórnarkjörs er til 17. mars nk. Kjósa þarf formann, varaformann, einn meðstjórnanda og einn varamann, skv. 5. grein laga Rithöfundasambands Íslands.

Skrifleg framboð til stjórnarkjörs berist skrifstofu RSÍ eigi síðar en kl. 14.00 þriðjudaginn 17. mars n.k


Tilnefningar til Bókmenntaverðlauna Norðurlandaráðs

Fríða Ísberg og Bergsveinn Birgisson
Myndir: Gassi/Helge Skodvin

13 norrænar skáldsögur, smásagnasöfn og ljóðabækur eru tilnefndar til bókmenntaverðlauna Norðurlandaráðs 2020, þ.á m. Kláði eftir Fríðu Ísberg og Lifandilífslækur eftir Bergsvein Birgisson. Rithöfundasamband Íslands óskar tilnefndum höfundum til hamingju með tilnefningarnar! Tilkynnt verður um verðlaunahafann á verðlaunahátíð Norðurlandaráðs í Reykjavík í október og keppa eftirtalin fagurbókmenntaverk um hnossið.

Danmörk

YAHYA HASSAN 2. Höfundur Yahya Hassan. Ljóðabók, Gyldendal, 2019.HHV, FRSHWN – Dødsknaldet i Amazonas. Höfundur Hanne Højgaard Viemose. Skáldsa…

Finnland

Vem dödade bambi? Höfundur Monika Fagerholm. Skáldsaga, Förlaget M, 2019.Ihmettä kaikki. Höfundur Juha Itkonen. Skáldsaga, Otava, 2018.

Færeyjar

Ikki fyrr enn tá. Höfundur Oddfríður Marni Rasmussen. Skáldsaga, Sprotin, 2019.

Ísland

Lifandilífslækur. Höfundur Bergsveinn Birgisson. Skáldsaga, Bjartur, 2018.Kláði. Höfundur Fríða Ísberg. Smásagnasafn, Partus forlag, 2018.

Noregur

Den gode vennen. Höfundur Bjørn Esben Almaas. Skáldsaga, Oktober forlag, 2019.Vi er fem. Höfundur Matias Faldbakken. Skáldsaga, Oktober forlag, 2019.

Samíska tungumálasvæðið

Juolgevuođđu. Höfundur Niillas Holmberg. Ljóðabók, DAT, 2018.

Svíþjóð

Marginalia/Xterminalia. Höfundur Johan Jönson. Skáldsaga, Albert Bonniers förla…W. Höfundur Steve Sem-Sandberg. Skáldsaga, Albert Bonniers förlag, 2019.

Álandseyjar

När vändkrets läggs mot vändkrets. Höfundur Mikaela Nyman. Ljóðabók, Ellips för…

Tilkynnt um verðlaunahafann 27. október

Handhafi bókmenntaverðlauna Norðurlandaráðs 2020 verður kynntur á verðlaunahátíð í Reykjavík þann 27. október í tengslum við þing Norðurlandaráðs. Verðlaunahafinn hlýtur verðlaunagripinn Norðurljós og 350 þúsund danskar krónur.


Nýju verkefni hleypt af stokkunum: Höfundaheimsóknir í framhaldsskóla

Miðstöð íslenskra bókmennta hefur nú hleypt af stokkunum verkefni sem ber heitið höfundaheimsóknir í framhaldsskóla, þar sem rithöfundar heimsækja skólana, hitta nemendur í kennslustund og ræða við þá um bækur sínar.

Guðrún Eva Mínervudóttir, Auður Ava Ólafsdóttir, Sigríður Hagalín og Kristín Helga Gunnarsdóttir

Markmið verkefnisins er að hvetja nemendur til lestrar og auka skilning þeirra og áhuga á bókmenntum og starfi rithöfunda.

Höfundaheimsóknirnar hefjast nú á vorönn, í fyrstu umferð taka fjórir rithöfundar þátt og mæta í tíma til nemenda í íslenskum bókmenntum þar sem þeir fjalla um og ræða bækur sínar. Nemendurnir hafa þegar lokið við að lesa a.m.k. eina valda bók þess höfundar sem kemur í heimsókn og fá tækifæri til að bera upp spurningar og vangaveltur sínar við höfundinn eftir lesturinn. 

Höfundarnir sem skólarnir hafa óskað eftir nú í fyrstu umferð eru: Auður Ava Ólafsdóttir, Kristín Helga Gunnarsdóttir, Guðrún Eva Mínervudóttir og Sigríður Hagalín.

Eftirtaldir skólar taka á móti höfundunum í heimsókn á þessari önn: Menntaskólinn við Hamrahlíð, Menntaskólinn við Sund, Tækniskólinn og Kvennaskólinn í Reykjavík.

Markmiðið er að bjóða nýjum skólum til leiks á haustönn og vonandi enn fleiri á komandi misserum.

Verkefnið er unnið í góðu samstarfi Miðstöðvar íslenskra bókmennta við Rithöfundasamband Íslands, Skólameistarafélag Íslands og með styrk frá mennta- og menningarmálaráðuneytinu. 


Íslensku bókmenntaverðlaunin 2019

Forseti Íslands, herra Guðni Th. Jóhannesson, afhenti Íslensku bókmenntaverðlaunin 2019, við hátíðlega athöfn á Bessastöðum þann 28. janúar. Verðlaunin skiptust í þrjá flokka og þeir sem að þessu sinni hlutu verðlaunin voru:

Fræðirit og bækur almenns efnis:
Jón Viðar Jónsson: Stjörnur og stórveldi á leiksviðum Reykjavíkur 1925-1965. Útgefandi: Skrudda.

Barna- og ungmennabækur:
Bergrún Íris Sævarsdóttir: Langelstur að eilífu. Útgefandi: Bókabeitan.

Fagurbókmenntir:
Sölvi Björn Sigurðsson: Selta: apókrýfa úr ævi landlæknis. Útgefandi: Sögur útgáfa.

Verðlaunahafarnir Bergrún Íris og Sölvi Björn ásamt Steingrími Steinþórssyni útgefanda f.h. Jóns Viðars og Jónasi Sigurðssyni tónlistarmanni.

Forseti Íslands setti samkomuna sem sjónvarpað var í beinni útsendingu á RUV. Því næst flutti Heiðar Ingi Svansson, formaður Félags íslenskra bókaútgefenda, stutta tölu. Forseti Íslands kynnti niðurstöður dómnefndar og afhenti verðlaunin. Verðlaunahöfundar ávörpuðu gesti.

Íslensku bókmenntaverðlaunin nema einni milljón króna fyrir hvert verðlaunaverk og eru kostuð af Félagi íslenskra bókaútgefenda. Auk þess er verðlaunahöfum afhent skrautrituð verðlaunaskjöl og verðlaunagripir, hannaðir af Jóni Snorra Sigurðssyni á gullsmíðaverkstæði Jens; opin bók á granítstöpli með nafni verðlaunahöfundar og bókar hans.

Fjögurra manna lokadómnefnd valdi verkin úr hópi fimmtán bóka sem tilnefndar voru til verðlaunanna í desember á síðasta ári þegar fimm bækur voru tilnefndar í hverjum flokki. Lokadómnefnd skipuðu Anna Þorbjörg Ingólfsdóttir, Bergsteinn Sigurðsson, Knútur Hafsteinsson og Ingunn Ásdísardóttir sem var jafnframt var formaður nefndarinnar.


Ljóðstafur Jóns úr Vör

Björk Þorgrímsdóttir, skáld, hlaut Ljóðstaf Jóns úr Vör fyrir ljóðið Augasteinn en afhending fór fram við hátíðlega athöfn í Salnum í Kópavogi þann 21. janúar sl.

Alls bárust tvö hundruð þrjátíu og tvö ljóð í keppnina sem var haldin í átjánda sinn. Freyja Þórsdóttir var í öðru sæti og Elísabet Kristín Jökulsdóttir í því þriðja.


Einnig voru afhent verðlaun í grunnskólakeppni en þar var Ingimar Örn Hammer Haraldsson nemandi í sjöunda bekk Álfhólsskóla hlutskarpastur fyrir ljóðið Svarthol.


Dvalarsetur í La Rochelle, auglýst eftir umsóknum

Rithöfundasamband Íslands (RSÍ) og Centre Intermondes de la Rochelle í samstarfi við Franska sendiráðið á Íslandi og Alliance Française í Reykjavik auglýsa eftir umsóknum um dvöl í dvalarsetrinu Centre Intermondes í einn mánuð í júní 2020. Umsóknir skulu vera á ensku.

Centre Intermondes í La Rochelle

Centre Intermondes is an international space of artistic residency dedicated to contemporary creation in all its forms (plastic, digital, musical, literary …).

 Since its creation in 2003 by sociologist Jean Duvignaud, nearly 350 artists from around the world have been welcomed.

The Center Intermondes is committed to support these emerging creators in their artistic process by offering work space, material support and professional expertise to support creation, research and mediation.

The Centre Intermondes seeks to encourage and develop international exchanges, with the aim of facilitating contemporary creativity in all forms of artistic expression, and thus to build bridges between cultures to the mutual enrichment of all.

A privileged space for debates and meetings, it connects the resident artists with the various cultural and educational actors in La Rochelle and in the Nouvelle-Aquitaine Region, in order to build joint projects and present their creation to various audiences.

Lesa meira

Sækja um