Rithöfundasamband Íslands

The Writers' Union of Iceland

Kristín R. Thorlacius látin

Amma í ParísKristín R. Thorlacius, rithöfundur, þýðandi og kennari er látin 85 ára að aldri. Kristín Rannveig Thorlacius fæddist 30. mars 1933. Hún varð stúdent frá Menntaskólanum í Reykjavík 1953, tók kennarapróf frá Kennaraháskólanum 1980 og bætti síðar við sig námi í bókasafnsfræði og útskrifaðist sem bókasafnskennari frá Háskóla Íslands.

Kristín var kennari við grunnskólann á Lýsuhóli í Staðarsveit 1973- 1994 og bókasafnskennari í Borgarnesi frá 1994 til 2005.

Kristín R. Thorlacius var þekktust fyrir þýðingar sínar á bókum fyrir börn en var einnig afkastamikill þýðandi skáldsagna og fræðibóka. Hún hefur þýtt yfir 50 bækur þar á meðal má nefna allar Narníubækurnar eftir C.S Lewis og Furðulegt háttarlag hunds um nótt eftir Mark Haddon. Hún hefur hlotið fjölmörg verðlaun og viðurkenningar á löngum ferli. Verk sem Kristín sjálf hefur skrifað eru meðal annars Börnin á bæ og saga af kisu, Var það bara svona, Saga um stelpu og Sunna þýðir sól.

Rithöfundasamband Íslands þakkar Kristínu samfylgdina og sendir fjölskyldu hennar samúðarkveðjur.

Lokað er fyrir athugasemdir.