Rithöfundasamband Íslands

The Writers' Union of Iceland

Heiðursfélagi og fyrsti formaður Rithöfundasambands Íslands er fallinn frá

formenn 012

Sigurður A. Magnússon rithöfundur og þýðandi er látinn 89 ára að aldri, hann lést í Reykjavík 2. apríl. Sigurður var ötull baráttumaður fyrir hagsmunum rithöfunda og leiddi sameiningu þeirra í eitt stórt og öflugt stéttarfélag. Hann var formaður Rithöfundafélags Íslands 1971 – 1972, formaður Rithöfundasambands Íslands hins fyrra 1972 – 1974 og fyrsti formaður Rithöfunda- sambands Íslands hins síðara 1974 – 1978. Íslenskir rithöfundar eiga SAM mikið að þakka.

Í stjórnartíð Sigurðar hjá RSÍ var loks gengið frá samningum við Ríkisútvarpið, fyrsti samningur við útgefendur var undirritaður í desember 1975 og skömmu síðar var í fyrsta sinn undirritaður samningur milli leikhúsanna í Reykjavík og leikritahöfunda. Á þessum tíma var líka gerður fyrsti samningur við Námsgagnastofnun. Stofnun Launasjóðs rithöfunda var síðan lögfest í árslok 1975. Verk Sigurðar í þágu menningar sjást víða og samverkamenn og þjóð eiga honum mikið að þakka. Barátta hans fyrir réttindum höfunda er undirstaða þess umhverfis sem ritlistinni er búið í dag. Okkar hlutverk er að standa vörð um þann góða grunn.

Rithöfundasambandið þakkar Sigurði samfylgdina og dýrmæta leiðsögn og sendir fjölskyldu hans hugheilar samúðarkveðjur.

Lokað er fyrir athugasemdir.